原创沈嘉祿海上梦叠
作者：沈嘉祿
沪语改写、讲述：边秦翌
指导：丁迪蒙
我小辰光，吃个物事少来西个，咸鱼就成了清贫生活个调剂品，也是吊吊味道个美食。比如讲咸带鱼，风干之后油煎，配泡饭最好吃，伊常庄有一眼眼“馁”，但是弄堂里向个男女老少侪勿讨厌搿种味道；假使讲呒没搿股味道了，反而心里勿踏实。还有一种黄鲒，体小肉薄刺多，一定要勒油里向煎到有一眼眼焦，连肉带骨头一道嚼嚼伊，味道再好唻。“龙头烤”是宁波人个专利，搿种鱼水分特别高，要用邪气多个海盐，腌到有眼苦哈哈，再晒晒伊，最后变成像篾竹片一样习习薄，油煎或者浇素油清蒸，又咸又鲜，连吃两大碗糙米饭绝对呒没问题。
搿歇饭店里有新鲜个“龙头烤”，必过调了名字，叫做“九肚鱼”或者“豆腐鱼”，上浆之后开油镬子炸，撒眼花椒盐快点趁热吃，外脆里嫩。咸鳓鲞算是比较正宗个咸鱼，到南货店买一条，头尾斩段，加肉糜或者咸蛋蒸一蒸，可以吃个两三顿。老底子阿拉屋里常庄买来吃，最后只剩鱼头，姆妈就加一调羹醋冲只汤，又是一道美味。天热了，暴腌小黄鱼就要登场唻。夜快头，弄堂底，水井旁边，小台子，一家门，金黄颜色个小黄鱼，香喷喷，乐融融。腌过再曝晒过个大黄鱼就是咸鱼当中个极品了，称之为黄鱼鲞，品质最最好个也叫做白鲞。我老家绍兴有一道邪气有名气个菜，就是用黄鱼鲞烧肉，逢年过节，一般人家侪会得烧一镬子，从正月初一吃到元宵。黄鱼鲞烧肉做冷盆也是勿错个，冻仔个颜色像琥珀一样，味道也交关好，搿只菜勒袁枚《随园食单》有记载：“法与火腿肉同。鲞易烂，须先煨肉至八分，再加鲞；凉之则号‘鲞冻’。绍兴人菜也。鲞不佳者，勿必用。”黄鱼鲞还可以配鸡，配白乌龟，侪比烧肉要高级。
黄鱼鲞也可以单独成菜，加黄酒加糖清蒸，冷脱之后拿肉撕成一条一条，一级了。黄鱼鲞斩块烧汤，加眼冬笋片搭仔黑木耳，或者只加嫩豆腐，啊呦喂，汤色乳白色了，味道勿要忒好哦。浙江一带个鳗鲞，也是南方人过年辰光个必备品，清蒸之后撕成条，喷眼白酒，真正是下酒个好小菜。老底子渔民勒海浪捉鱼，捉到鳗鱼就开膛弄清爽，用竹签撑开鱼肚皮，挂勒船尾巴，迎牢仔风吹干，上岸就是一味美食了。
我搿歇住勒老城厢大南门外，江阴街浪有一只鱼摊头，每年春节前一个多号头，老板就开始加工新风鳗鲞，长一米多，宽一尺左右，肚膛用竹签撑开，鱼尾巴浪挂一块红布头，高头写好买家个姓名搭仔重量，一条条挂勒屋檐下头阴干。看上去老老壮观个，每趟路过，侪要多看两眼。
有一位老作家写文章，回忆三十年代伊刚刚到上海个辰光，正好年关将近，伊勒南京路三阳南货店门口看到一条老老长个鳗鲞，从二楼窗口吊下来，像广告牌一样，大约摸五米，银光闪闪个，吸引了交关市民。过了元宵节，店家再收起来囥好，到来年再用。伊不清爽为啥搿条鳗鲞一直勿会坏脱。前两天我勒上海电视台做节目，正好搭三阳南货店有关，但是伊拉个经理也搞勿清爽搿只故事。勒宁波我吃到过一种沙鳗鲞，比海鳗小得多，比河鳗也小，肉质鲜嫩，骨刺软绵，配老酒味道邪气好。
可惜啊，电子时代个到来，咸鱼就勿大吃香唻。搿歇一般家庭普遍侪有冰箱，总归觉着冰冻鱼像煞比咸鱼更加好。其实，冷藏冷冻个水产品鲜味道大大流失；再讲，勒抛弃咸鱼个同时，也等于自动放弃了一种生活乐趣。
如今，腌渍咸鱼个工艺好像也慢慢叫失传了，就算勒某些地方还勉强存在，质量也吃勿准了。我亲眼看到过，一只苍蝇扑到一条色香俱佳个咸鱼浪，搓了几记腿脚就死脱了；有人讲为了防苍蝇，居然有无良商家拿农药喷洒勒咸鱼高头。搿种咸鱼啥人还敢吃啊？看样子，咸鱼已经蛮难“咸鱼翻身”了呀。
作者：沈嘉祿讲述者：边秦翌原标题：《咸鱼白粥，人生有味（下）》